Bilang isang pagpugay sa sinabi ni Dr. Tangonan patungkol diyan, nais kong ibahagi ko ang sariling opinyon ko ukol sa kanyang sinasabi ayon sa aking pangarap sa buhay.

Iniisip ko na kapag nakapagtapos na ako ng kolehiyo, hahanap ako ng eskwelahang aking mapapasukan para sa aking pag-aaral ng masteral at doktoral sa ibang bansa sapagkat kulang na kulang ang maibabahagi ng edukasyon dito sa Filipinas sa paglawig ng kaalaman at teknolohiya. Maigi nang tugunan ko ito sa pamamagitan ng pagpapalit-kaalaman sa mga bansang maunlad at magtatag ng sarili kong pangalan sa industriya sapagkat mas madaling umusbong doon kung ihahambing sa pag-usbong dito. Kapag nakapagtapos na ako at nagkaroon na ako ng sapat na kakayahan at karanasan sa napili kong larang at industriya, makikipagsapalaran ako upang makapagtatag ng sarili kong start-up technological firm. Balang araw, babalik ako rito ng may uwing industriyang puedeng maghatid ng trabaho at karagdagang kakayahan sa ating kababayan. Sa tingin ko isa ito sa mga pagtingin at adhikain ng iilang Filipino na piniling magtagal sa ibang bansa upang maghatid serbisyo rito sa hinaharap.